ch. 2
Ep.2.1
Natus igitur patre, quo diximus, genere honesto,
pauper iam a maioribus relictus est, eruditus autem
sic ut nemo Thebanus magis. nam et citharizare et
cantare ad chordarum sonum doctus est a Dionysio,
qui non minore fuit in musicis gloria quam Damon
aut Lamprus, quorum pervulgata sunt nomina, cantare tibiis ab Olympiodoro, saltare a Calliphrone.
Ep.2.2
at philosophiae praeceptorem habuit Lysim Tarentinum,
Pythagoreum: cui quidem sic fuit deditus, ut adulescens tristem ac severum senem omnibus aequalibus
suis in familiaritate anteposuerit; neque prius eum
a se dimisit, quam in doctrinis tanto antecessit condiscipulos, ut facile intellegi posset pari modo superaturum omnes in ceteris artibus.
Ep.2.3
atque haec ad nostram
consuetudinem sunt levia et potius contemnenda; at
in Graecia, utique olim, magnae laudi erant.
Ep.2.4
postquam ephebus est factus et palaestrae dare operam
coepit, non tam magnitudini virium servivit quam
velocitati: illam enim ad athletarum usum, hanc ad
belli existimabat [utilitatem] pertinere. itaque exercebatur plurimum currendo et luctando ad eum finem,
quoad stans complecti posset atque contendere. in
armis vero plurimum studii consumebat.
